BJP-in Nepal leh Sri Lanka-ah sorkar siam tum - Tripura CM

Tripura chief mi­nister Biplab Kumar Deb chuan Rabindra Satabarshiki Bhavan-a BJP programme an hmannaah, union home minister Amit Shah chuan ṭhenawm ram pahnih, Sri Lanka leh Nepal ramah BJP sorkar siam a tum tih a sawi.

Deb chuan BJP president hlui, Amit Shah chuan India ram state zawng zawnga BJP sorkar an siam hnuah, ṭhenawm ram pahnihah pawh BJP sorkar siam tumin hma an la dawn tih a hrilh niin a sawi. Amit Shah chu nasa taka fakin, a kaihhruaina hnuaiah BJP chu khawvela political party lian ber a ni thei tih sawi a ni. 

Chief Minister thu­sawi hian sawi zui a hlawh hle a, Tripura-a eptu party-te chuan CM thusawi hi sawifiah turin central lama BJP hruaitute an phut. CPI(M) leader leh MP hlui, Jitendra Chaudhary chuan CM hian constitution leh de­mocracy awmzia pawh a hrethiam lo nia a lanthu sawiin, Amit Shah thusawi nia a sawi chungchang chu ram dang inrelbawlnaa India inrawlh tumna a nih theih thu a sawi. 

Chaudhary chuan Deb thusawi hi a dik a nih chuan, Home Minister chu Nepal sorkar phiarruknaa inrawlh ang a ni thei tih sawiin, hemi chungchang hi enliam mai chi ani lo a, BJP hruaitu lu, prime minister Narendra Modi thlengin an sawifiah a ngai a ni, a ti. 

Tripura Congress unit vice-president Tapas Dey pawhin Amit Shah thusawi nia tarlan chu sawiselin, India chu Nepal leh Sri Lanka inrelbawlna kawngah a inrawlh tur a ni lo, tiin a sawi.