Manipur : Imphal airport hming thlakna tur pass

Manipur Legislative Assem­bly chuan Imphal International Airport hming thlak a, an hnam pasalṭha hming chawia ‘Bir Tikendrajit International Airport’ tia thlakna tur reso­lution chu Thawhṭanni khan an pass. 

Airport hming thlakna tur motion hi House Leader N Biren Singh-a'n a pulut a, opposition leader O.Ibobi Singh pawhin a lo thlawp nghal a ni. House-in resolution a pass hi a buaipui turte kutah a rang thei anga bawhzui tura pe nghal tura a duh thu a sawi bawk. 

Manipur hian Thawhṭanni leh Thawhlehni khan assembly an nei a ni. CM hlui leh Congress hruaitu Ibobi Singh chuan Congress kaihhruai sorkarin kum eng emaw zat liam taa airport zauhna tura ram acre 500 dawna zau nei tura hma a lak dante sawiin, airport hming thlak chu a thlawp thu a sawi. Imphal airport hi Southeast Asia ram tam zawkte nena thlunzawm theih a nih avangin hmun pawimawh tak a nih thu a sawi. 

Airport hming an chawitir, Bir Tikenjadrit hi Manipuri prince Koireng a ni. Manipur lal Chandrakriti fapa a ni a, independent kingdom of Manipur army commander a ni. Britain-in an ram a laksak tur do a, theihtawpa a beih let avangin a hmingthangin Manipur mite ngaihsan a hlawh hle. British rorelna a dodal avangin kum 1891 khan Imphal ground-ah khaihlum a ni a, an khaihlumna  hmun hi Bir Tikendrajit Park tiin a hming vuah zui a ni bawk. Kum 2007 khan Manipur sorkar chuan a hming chawiin an state-a flyover hmasa ber siam chu a lo hawng tawh bawk. 

Imphal airport hi Imphal khawpui aṭanga chhim lam km 7 vela hlaa awm a ni a, hmar­chhaka airport lian leh lun lam­ah a pahnihna a ni.