AP tana MBBS leh BDS quota tihtawp tum duh lo

All Arunachal Pradesh Students' Union (AAPSU) chuan union health  ministry-in academic session 2019-2020 aṭanga Arunachal Pradesh-in central pool-a MBBS leh BDS quota seat a neihte tihtawp a tum chu na takin an dodal. 

AAPSU president Hawa Bagang chu thuchhuah siamin, "Arunachal Pradesh-a medical college awmchhun, Tomo Riba Institute of Health and Medical Science (TRIHMS), Naharlagun-a seat awm zat 50 aṭanga 100-a tipung tura ngen a nih lai rengin hetiang thutlukna hi an rawn siam a ni. TRIHMS-a seat 50 aṭangin 15% chu all India quota hnuaiah pek a ni a, a bak seat la awm chu state chhunga medical lam zir duhte tan a tam tawk lo a ni," a ti. 

Zirlai pawl chuan an state zirlai, National Eligibility cum Entrace Test (NEET) a qualifying mark hmu phate chuan state danga medical collage-ah quota pawh an hmu thei lo tih an sawi. Hei vang hian an state tana central poll MBBS/BDS quota seat chu kum hmasa ang bawka pek chhunzawm an phut thu an sawi a ni. 

AAPSU chuan an thil phut chungchang hi sorkar laipui hnena sawi turin state sorkar leh an state MP pathum, Kiren Rijiju, Tapir Gao leh Mukut Mitthi-te an phut tih an sawi nghal bawk.