Tripura: Zirtirtu banten police laka lungawi lohna lantir

Tripura-a zirtirtu ban, Joint Movement Committee (JMC) hminga nawrh huaihawtte chuan an laka police-te chet dana lungawi lohna lan­tirin, Thawhṭanni khan Agartala-a Rabindra Satabarshiki Bhawan kawt­ah an pungkhawm. 

JMC hruaitu Dalia Das chuan January 27 khan nawrh an huaihawtna hmun chu police-te hian luhchilhin, an laka rawng taka an chet thu a sawi. Police-te hian rubber bullet, tear gas, water canon leh tiangte an hmang a, dik lo takin an zinga tam tak chu thubuai siamsak an ni bawk tih a sawi. 

January 27-a police-ten nawrh huaihawtna hmun an luhchilh ṭum khan zirtirtute nen hian innawr buaiin, mi 87 in hliam an tuar a ni. Hliam tuar zingah hian zirtirtu 70 telin, police mi leh sa 17 an hliam tel bawk. Das chuan hemi ni hian an hnaa dah let leh an phut chungchangah Chief Minister hmu tura kal an tum a, mahse zingah security force-te hian an awmkhawmna hmun hi rawn luhchilhin, an puan in kaihte an tichhia a, nawrh huaihawtte chu kut an rawn thlak zui niin a sawi. An thawmhnaw leh ei turte pawh police-te hian an laksak niin a sawi bawk. 

Agartala-a an awm­khawmna hmun aṭanga hnawhdarh an nih hnuah, February 3 aṭang khan zirtirtu ban takte hian nawrh chhunzawm leh an tum a, mahse police-ten phalna an pe duh tawh lo a, hei vang hian Tripura High Court-ah zualko mek a ni. 

Tripura High Court chuan petition thehluh chungchangah Tripura sorkar hnenah hriattirna a pe tawh a, Agartala-a sit-in protest an buatsaih tum phalsak an nih loh chhan chu March 1  hmaa sawifiah turin a ti a ni. Zirtirtu ban takte counsel, Purushottam Roy Barm chuan mi tinin boruak ṭha tak hnuaia pungkhawm buatsaih theihna turin dikna chanvo an nei vek a ni tiin, police-te chuan hei hi an lo dansak ngawt thei lo tih a sawi.