Manipur : Thla 11 hnuah Ima Keithel hawng leh ta

Manipur chief mi­nister N Biren Singh chuan Thawhṭanni khan Imphal-a Ima Keithel (women market) chu kum khat dawn khar a nih hnuah hman theihin a hawng leh ta. 

Imphal khawpui laili laia awm, Ima Keithel hi hmeichhiate enkawl niin, he hmuna dawr nei pawh mi 4,000 chuang pawh hmeichhia vek an ni. Asia khawmuala hmeichhe hlang enkawl  bazar pui lian ber nia sawi a ni. Covid-19 hripui leng vangin kum khat dawn khar a ni tawh. 

CM Singh chuan Ima Keithel khar hian hri darh tur venna kawngah nasa takin a pui niin a sawi a, hri leng dona kawnga sorkar hmalaknate an thlawp ṭhat leh an thawhpui ṭhat avangin he hmuna dawr nei nuho chungah lawmthu a sawi. 

Manipur-a women market pathum - Purana Keithel, Laxmi Keithel leh New Market-te chu nikum March 21 aṭang khan hripui leng vangin khar an lo ni tawh bawk. Hun rei tak market khar a nih avang hian he hmuna eizawngtu hmeichhia tam tak chuan sum lamah harsatna pawh an tawh phah a, Manipur sorkar chuan nikum August thla khan hmeichhe vendor 817 hnenah loan a lo pe tawh a ni.