Meghalaya-in rualbanlo puala sports academy siam rawt
Meghalaya sorkar chuan an state-ah rualbanlote puala sports academy din a rawt a, hemi atan hian ram acre 50-a zau a pe bawk.
Union minister of state for social justice and empowerment Ramdas Athawale chuan cheng vaibelchhe 350 senga Sports Academy for Disabled din rawtna hi a ministry chuan a ngaihtuah dawn tih a sawi.
Minister Athawale chuan, "Rualbanlohna hrang hrang neite pawhin midangte ang bawka hun remchang an neih theihna turin kan ministry chuan theihtawp kan chhuah zel dawn a ni. Hei hi an dikna chanvo humhalhna a nih bakah, society-ah pawh tlangnel taka an tel theihna tur a ni," tiin Meghalaya sorkar official-te nena review meeting an neihah a sawi a ni.
Athawale chuan 2011 census-a a landanin, Meghalaya-ah hian taksa lama rualbanlo 44,000 an awm tih a sawi a, rampumah vaibelchhe 2.68 an awm bawk niin a sawi. State chhunga rualbanlo zinga 11,000 te chuan pension, thla tinin Rs 500 an dawng a ni, a ti.
Rualbanlote hamṭhatna leh dinhmun chawikanna turin an ministry chuan a bei zel tih sawiin, union minister chuan central, state sorkar leh semi government service-ahte disability reservation pawh an tipung tih a sawi bawk.