Meghalaya-in fuel man Rs 5-in tihhniam belh leh

Meghalaya sorkar chuan Thawhlehni aṭang khan petrol leh diesel-a VAT a lak chu litre khatah Rs 5 ve vein a tihhniam belh leh. 

State sorkar hian a hmain petrol leh diesel-a chhiah lak hi Rs 2 ve vein a lo tihniam tawh a, mahse commercial transporter-te chuan tihhniam belh leh tura phutin nawrh an huaihawt a, Thawhlehni khan Rs 5-in a tihhniam belh leh ta a ni. 

Chief minister Con­rad K Sangma chuan Thawhlehni khan cabinet minister leh sorkar official ṭhenkhatte nen review meeting an nei a, hetah hian petrol leh diesel man tihhniam belh leh hi an rel a ni. Chhiah lak tihhniam belh a nih leh tak avangin state khawpui, Shillong-ah chuan petrol hi litre khat Rs 85.86 leh diesel litre khat Rs 79.13-ah a tlahniam. 

Meghalaya sorkar hian financial year liam taah khan petrol leh diesel chhiah a lak aṭang hian cheng vaibelchhe 326 a la lut a ni. State chuan Power Grid Coporation of India Ltd leiba, cheng vai­belchhe 74 chuang an pek theih loh avanga state chhunga ni khata darkar 7 zel load shedding siam ṭhin pawh tihtawp a ni tawh dawn tih a sawi. Sorkar chuan power leina sum an bat hi pek fel an tiam a ni, hemi hnu hian power company pawhin power cut a siam ṭhin hi tihtawp a remti tih CM chuan a sawi. 

Sangma chuan an leibate rulhna atan hian state sorkar chuan sorkar laipui hnen aṭangin Aatmanirbhar loan, Rs vbc 1,345 a tifel tih sawiin, REC hnenah Rs vbc 127 pek a ni tawh tih a sawi. REC hian fund-te hi pe chhuak lehin, PGCIL ba pawh hi pek fel thuai a ni ang, a ti.