Manipur newspaper office beitu SIT in chhui dawn

Manipur chief minister N Biren Singh chuan Imphal-a nitin chhuak chanchinbu, 'Poknapham' office grenade hmanga beih a nih dan chhui chiang turin Special Investigation Team (SIT) din a nih thu a sawi.

SIT-ah hian member pali awmin, Imphal West district superintendent of police,  K Meghachandra Singh-a'n a ho a ni. Media mite beih an ni chu a dem thu sawiin, CM chuan mi dawihzep thiltih a ni a ti a, pawi­khawihtu pawh man thuai a ni tur thu a sawi bawk. Media house beih a nih avang hian chanchinbu miten lungawi lohna lantirin, chanchinbu leh cable news tihchhuah an tihtawp lailawk a, nimin thleng khan chanchinbu leh local television channel te tihchhuah an la ni lo.  CM chuan media mite hnenah an nawrh hi titawp a, mipuite tana an service te kalpui chhunzawm tawh turin a ngen bawk.

All Manipur Working Journa­lists’ Union (AMWJU) leh Editors’ Guild Manipur hmingin chanchinbu mite chuan media house beih a nih avanga lungawi loin Keisamphat, Imphal-ah sit-in protest an nei a ni. Pathiannia Poknapham office beih chungchangah hian mimal emaw, pawl emaw an tih nia chhal an la awm lo. CCTV footage aṭanga a lan danin, two-wheeler khalhtu hmeichhe pakhatin office chhunga hian Pathianni khan grenade a vawm lut a, mahse vanneihthlak takin a puak lo hlauh a ni. Police-te chuan he grenade hi puak ni se chuan office-a hnathawkte awm  leh an office tlawhtu mi eng emaw zat chuan hliam an tuar thei dawn niin an sawi.