KHADC CEM HS Shylla-an NPP chhuahsan

Meghalaya-a Khasi Hills Autonomous District Council (KHADC) Chief Executive Member (CEM) Hispreaching Son Shylla chuan Ningani khan National People’s Party (NPP) a chhuahsan.

CEM Hispreaching Son Shylla chuan MDA sorkar in District Council-a bill pass ṭhen­khat an tihkhawtlai avangin NPP hi a chhuahsan tih a sawi.

Confederation of Hynniew­trep Social Organisation (CoHSO)-ten Ningani-a public rally an buatsaihnaa media-ten an kawmnaah Shylla chuan sorkar laiin Council bill pawm an tihkhawtlai chu inhmuhsitna a nih thu leh sorkar chuan autonomous thumal awmzia an hriat loh thu a sawi. District council chu department pakhat ang maiin an ngai tih a sawi bawk. Secretariat-a officer-te chuan Council aiawha thlanchhuahte thuneihna chu an ngainep tih a sawi a ni.

Council in bill an pawm tawh lo pawm nawn leh chu secre­tariat-a officer-te hna a nih thu sawiin, KHADC chu autonomous body a nih avangin bill lo tihkhawtlai theihna dan chu an nei lo tih a sawi. Council in bill a pawm chu danah chantir tur a nih thu a sawi bawk.

NPP chuan MDC dinhmun an hrefiah lo tih sawiin KHADC-a Inner Line Permit (ILP) Bill pawm a nih loh chhan pawh sorkar laipui ni loin  Chief Minister Conrad K Sangma a nih thu a sawi.

KHADC CEM chuan NPP chu ram leilung fate ngaihsak loah a puh bawk.

Shylla chuan MUDA buil­ding bye-laws kalpuina Council tuartir an nih avangin na takin sorkar a sawisel a, Council chuan MUDA building bye-law chu an kalpui thei dawn lo tih a sawi a ni.