CAB dodaltuten Assam BJP hruaitu kutthlak

Upper Assam Tinsukia district BJP president Lakhes­war Moran chu Nilaini khan Citizenship Amendment Bill dodaltu-ten kut an thlak.

RSS pawl hnuaia awm, Lok Jagran Manch-te meeting buatsaiha a telnaah CAB dodaltute hian kut an lo thlak nia sawi a ni.

Lok Jagran Manch-te hian Citizenship Amendment Bill chung changa thu dik lo thehdarh awm nia an hriatte puanchhuahna hun public meeting an buatsaih a, mita hmutute sawi dan chuan BJP hruaitu Moran pawh hi he hunah hian a kal a, a hmun a va thlen hian CAB duh lotute chuan slogan kenga lo hmuakin, flag dumte an lo keng niin an sawi. He hunah hian CAB dodaltu mi 3000 vel lai an awm nia sawi a ni bawk. 

Bill duh lotu ten Lakhe­swar Moran kut an thlak lai video hi a darh bawk a, video-a a landan chuan Moran hi an ben bakah a samah te an kek a ni. Dodaltute hian BJP member dangte pawh kut an thlak a ni.

Moran hi damdawi-inah kalpui nghal niin, BJP chuan FIR an thehlut nghal a, tualchhung ṭhalai ṭhenkhat chu man an ni tawh bawk.