Manipur-ah bomb puak, tleirawl pahnih thi

Manipur Noney dis­trict-a tlang pakhatah Zir­tawpni khan bomb a puak a, tleirawl pahnih an thi niin police-te chuan an sawi.

Police-te chuan thite hi unau an nih thu sawiin, an khua Leisok thingtlang khaw bula tlanga an lawn laiin bomb hi a puak ta niin an sawi a, thite hi Akhiuna Kamei (17) leh Gaikhonlieu Kamei (15) an nih thu an sawi bawk.

A upa zawk hi a hmun­ah thi nghalin a nau­pang zawk erawh hi chu damdawi-in panpui a nih laiin a thi thung a, an nu pawhin hliam na tak a tawrh thu leh damdawi-ina enkawl nghal a nih thu police-te chuan an sawi.

Report ṭhenkhat chuan bomb puak hi hel pawl phum a nih an rin thu an tarlang a, henglai tlang velah hian hel pawl chetla ṭhin an awm nual nia sawi a ni.