Meghalaya-a buaina chhuakah mi pathum thi District parukah internet service titawp

Meghalaya-a East Khasi Hills district-a Citizenship Amendment Act (CAA) duh lohna lan tir leh Inner Line Permit (ILP) system phuta kawng zawh huaihawtnaa, kawngzawh huaihawttu Khasi Students Union (KSU) leh non-tribal te inkara buaina chhuak vanga thi chu nimin thleng khan mi pathum an tling tawh. Mi dang 10 chuang an hliam bawk. 

Police official-te chuan buaina chhuah ṭanna chu Ichamati area-ah a nih thu sawiin, KSU member-te leh tualchhung mi, non-tribal te an intibuai tih an sawi. KSU member-te hian bazar-a thil dahkhawmte chu halin, tualchhung mite hian zirlai pawl member-te chuanna bus chu lungin an tawng ve bawk a ni. He hmuna buaina chhuakah hian KSU hruaitu pakhat chu a thi a, hmun dangah buaina pawh a punlun zui ta a ni. 

Buaina chhuak kaihhnawihah hian mi pariat man an ni tawh a, thil thlen dan chhui chiangtu tur din a ni tawh bawk. 

Zirtawpnia buaina chhuak vang hian Shillong-ah curfew puan nghal a ni a, mahse nimin zing aṭang khan zan lama curfew puan chu hlih a ni. Mahes Lumdiejgjri leh Sadar police station leh, Cantonment Beat House huam chinah erawh chuan tiam chin awm loin curfew hi puan chhunzawm a la ni.  Hei bakah hian Meghalaya district 11 zinga distric paruk - East Jaintia Hills, West Jaintia Hills, East Khasi Hills, Ri Bhoi, West Khasi Hills leh South West Khasi Hills-ah internet service tihtawp a ni bawk. Shillong-ah bik chuan SMS service pawh khuahkhirh niin, ni khatah SMS panga chiah thawn chhuah theih a ni. 

Chief minister Conrad Sangma chuan buaina chhuak chu pawi a tih thu leh, buaina chhuak vanga nunna chan chhungte a tawrhpui thu a sawi. Thi chhungte chu zangnadawmna cheng nuai hnih pek an nih tur thu a sawi bawk. CM chuan mipuite chu tharum thawhna thlen zawnga che lo a, boruak muanawm siam turin a ngen. CM hian home minister, DGP leh East Khasi Hills district DC-te chu buaina chhuak vang hian emergency meeting pawh a neihpui  nghal a ni.