Congress-in CAA duhlohna lantirna gamosa nuai 50 lakkhawm tum

Assam Congress chuan Citizenship Amendment Act (CAA) duhlohna lantirna kal zelah, CAA dodalna thu ziah lanna Assamese puan, gamosa  nuai 50 lakkhawm an tum. 

Congress party hian ass­embly inthlan lo awm turah sorkarna siam tura thlan tlin an nih chuan Guwahati-ah CAA dodal­na lantirnaa nunna chante hriatrengna hmun siam an lo tiam tawh bawk a ni. Party hruaitu, Rahul Gandhi pawhin Assam-ah Congress in sorkarna a siam chuan CAA chu hman a ni ve dawn lo tih a sawi bawk. 

Congress Manifesto Commi­ttee chairman Gaurav Gogoi chuan sawi hlawh tak leh Assam mipuiten an duh loh, CAA chu an dodal zel dawn tih sawiin, party member-te chu state chhunga in tin tlawh kual a, CAA dodalna thu ziah lanna gamosa chu lakhawm turin a ti. Heng puan an lakkhawmte hi CAA vanga martarte hriatrengna hmun an siamah pholan an nih tur thu a sawi. 

Gogoi chuan mipuite hnenah an gomasa-ah chuan, Assam-a CAA hman an duh lohna chhan­te ziak a, an hming ziak lang bawk turin a ngen. Thu an ziahna puan chu party worker-te hnenah pe tur te, a remchang lo a nih pawhin courier hmanga thawn mai turin a ngen. Assam tana an beihnaah mitinte tel theihna hun remchang a ni tih sawiin, an hmalakna chu thlawp turin state mipuite a ngen. 

Assam Pradesh Cong­ress Committee (APCC) president Ripun Bora pawhin Assam aṭangin CAA nuaibo a ni dawn tih sawiin, an state tana hriatreng tur thil an siam dawn tih a sawi. Congress Legislature Party (CLP) leader Debarata Saikia pawhin BJP-in Assam mipuite an awpbehna chu a tawp dawn hnai tih a sawi bawk.