Manipur doctor-in Japan chawimawina sang dawng

Japan sorkar chuan Manipur sorkara, Dr Thangjam Dhabali Singh chu Japan leh India-in inlaichinna ṭha an neih theihna tura a hnathawh ṭhat avangin chawimawina sang, 'Order of the Rising Sun, Gold and Silver Rays' a hlan. 

He chawimawina hi Japan sorkarin sipai leh politician ni lo hnena chawimawina a hlan theih sang ber zinga mi a ni a, ram inlaichinna ṭha, Japan culture chawilarna, environment humhalhna kawnga hnathawh ṭha bakah anmahni field bika hlawhtlinna ropui tak neite hnenah a hlan ṭhin. 

Official thuchhuahin a tarlan danin, Dr Singh hi Manipur Tourism Forum (MTF) president a nih lai, kum 2012-2017 chhung khan Japan leh Manipur-in thawhdunna leh inzawmna ṭha tak an neih theihna turin hma a la nasa hle a, inzawmna ṭha tak an siam phah a ni. 

Dri Singh hian Indopui II-na Battle of Imphal thlen champha vawi 70-na hmanna turah pawh hma a la nasa hle a ni. Japan ambassador Satoshi Suzuki chuan, "Japan leh Manipur-in inzawmna ṭha tak an neih theihna tura Dr Singh hmalakna hi kan ngaihlu hle a ni," a ti. 

Imphal Peace Museum sak a nih theihna turin Dr Singh hian tha a thawh nasa hle tih Suzuki chuan a sawi bawk a, "Kum 2019, June thlaa hawn Museum hi Dr Singh kaihhruaina leh hmalakna tel lo chuan a tihpuitlin theih a ni lo ang. He museum hi kan ram miten history an hriatrengna tur pawimawh tak a ni. A hnathawh ropui tak avangin Dr Singh hi lawmthu ka hrilh nawn leh duh a ni," tiin a sawi. 

Dr Dhabali Singh chuan Japan sorkarin chawimawina a  hlan chu a phu lo hle tih sawiin, MTF leh ICF-a a thawhpuiten an thlawpna avanga a lawm thu leh, Japan nena inṭhianṭhatna nghet leh thuk zawk neihna turin kawng hrang hrang an la dapchhuah zel a rin thu a sawi bawk.