Inthlana Golay din leh din lohah SDF buai lo

Sikkim-a sorkarna siam mek Sikkim De­mocratic Front (SDF) chuan Sikkim Krantikari Morcha (SKM) president P.S. Golay chu inthlan awm tura a din leh din loh turah an party chu an buai lo tih an sawi.

SKM chuan Chief Minister Pawan Cham­ling-a kaihhruaina hnuaiah an party chu inthlan awm turah ṭha taka an inbuatsaih thu sawiin, an policy leh programme-ah pawh an inbuatsaih ṭhat thu an sawi bawk. Golay chu thiam loh chantir a nih hnua MLA aṭanga paih a nih leh, kum ruk chhung disqualify a nihna chu dan ang taka kalpui a la nih reng dawn thu an sawi a ni.

SDF thupuangtu K.T. Gyaltsen chuan SKM party chu Ministry of Law and Justice, (Legis­lative Department) in an tihchhuah Repealing and Amending Act, 2015 behchhana thuchhuah siamah a puh a, hemi hmang hian Golay chu inthlanah a din phalsak a ni dawn nia an tarlan thu a sawi. Mahse Re­pre­sentation of the People Act, 1951 Section 8 (1) (m) (ii) hnuaiah Prevention of Corruption Act, 1988 (49 of 1988) hmanga thiam loh chan­tirte chu kum ruk chhung hram an nih tur thu chiang takin tarlan a nih thu a sawi bawk.

SDF chuan Election Commission of India pawhin Prevention of Corruption Act, 1988 (49 of 1988) hnuaia thiam loh chantirte chu chhuah an nih aṭanga kum ruk chhung chu inthlana din phalsak an nih loh thu an tarlang tih an sawi a ni.

Hetihlai hian Zirtawpni liamta khan SKM chuan an party president Golay chu inthlanah a din dawn thu an sawi thung.