Manipur zirlai pawlten President thusawi dem

Manipur-a zirlai pawl lian pathum chuan President Ram Nath Kovind-an Citizenship (Amendment) Bill 2016 chungchanga a thusawi chu an dem thu an sawi.

Parliament joint session-a Ram Nath Kovind-a thusawi hian sawisel a hlawh nasa hle a, Bill pawm a nih lohna tura New Delhi-a zirlai awmchilhte phei chuan an sawisel nasa hle a ni.

All Manipur Students Union (AMSU), Manipur Students Federation (MSF) leh Democratic Students Alliance of Manipur (DESAM)-te chuan Rajya Sabha-ah bill chu pawm a nih phei chuan duh lohna chu nasa lehzuala an lantir dawn thu an sawi.

AMSU president Manjit Sarangthem chuan an pawl chuan Prime Minister hnenah pawh memorandum an thehluh tawh thu sawiin President thusawi chuan Bill a thlawpzia a lantir thu leh chu chu hmarchhak mipuite duhdan kalh a nih thu a sawi a ni.

Manipur CM N Biren Singh pawhin Union Home Minister Rajnath Singh hnenah CAB chungchangah hian thunhnai khan memorandum a thehlut tawh bawk.

Deputy Chief Minister Y Joykumar Singh pawhin an party National People’s Party (NPP) chuan Rajya Sabha-a bill pawm a nih chuan BJP an thawhpuina an titawp dawn tih a sawi a ni.

President Ram Nath Kovind chuan kar liamta Ningani khan Citizenship Amendment Bill chu sakhuana avanga harsatna tawkte tana inhumhimna pe tur a nih thu a sawi, India rama inhumhimna zawngte tana khua leh tui nihna pe theitu tur a nih thu a sawi a ni.