NESO aiawh-ten Meghalaya CM Conrad Sangma hmu HM hnen aṭangin chhanna ṭha lam kan hmu: Sangma

North East Students’ Organization (NESO) hnuaia awm - AASU, AAPSU, MZP, KSU, GSU, TSF, NSF leh AMSU aiawhte chuan Pathianni khan Meghalaya Chief Minster Conrad K. Sangma leh political party dang-te chu CM chenna inah hmuin, Citizenship Amendment Bill (CAB) chungchanga an ngaihdante an thlen.

Conrad Sangma chuan hmar­chhaka political party hrang hrang aiawhten Union Home Minister Rajnath Singh hnena an thu thlente chuan rah ṭha tak a chhuah niin a lo sawi a ni.

Hmarchhak chief minister-te chuan New Delhi-ah Rajnath Singh hi an hmuh thu sawiin, an meetingah hian thil ṭha lam hriattur a awm tih a sawi.

Sangma chuan Union Home Minister hnen aṭang pawhin chhanna ṭha lam an hmuh thu sawiin, hmarchhak mipuite ngaihdan chu a ngaihpawimawh sak thu a sawi a, CAB chu ram pumah pawh issue pawimawh tak a nih thu a sawi bawk.

Hmalakna liantham neih a nih hmain CAB chungchangah inrawnna a awm phawt dawn tih sawiin, hmalak zel dan turah pawh chanchin duhawm lam an hria nia a lan thu a sawi.

CM Sangma chuan bill kal­tlang­ pui tura sorkar laipuiin hma a lak loh nan an theihtawp an chhuah tih sawiin, bill dodalna hna an thawh pawh an chhunzawm zel dawn thu a sawi a ni.