Hmarchhak politics hruaitu PM hmuh tum hlawhchham nawn

Citizenship Amendment Bill chungchanga hmarchhak political party hruaituten Prime Minister Narendra Modi hmuh an tum chu a ṭum hnih nan an hlawhchham leh.

Hmarchhaka CAB dodalna a nasat em em laia Prime Minister hmuh an tum ṭum hnih lai a hlawhchham ta hian boruak a tihchhiat zual hle rin a ni. 

Meghalaya Chief Minister Conrad K Sangma leh AGP leader Atul Bora-te kaihhruai team-te chu New Delhi-ah inkulhin ni eng emaw zat chu an cham tawh a, CAB dodal turin NDA-a an thawhpuite thlawpna an zawng mek bawk a ni.

Prime Minister Modi hmu tura kal political party hruaitute hi nimin khan anmahni state-ah an let leh rin a ni a, Delhi an cham chhung hian NDA-a an thawhpui party hrang hrang an hmu a,  Shiv Sena leh JD (U)-te pawh hmuin heng party meeting an neihpuite hian Rajya Sabha-ah bill hi pharh a nih chuan a duh lo lamah vote an tum tih an sawi thu an tarlang.

Meghalaya CM Conrad Sangma leh a kaihhruai team-te chuan a hmain New Delhi-ah Prime Minister hi hmuh an tum tawh bawk a, mahse hlawhchhamin an state-ah an let leh a ni. Tunṭumah pawh hian Modi hi a buai lutuk tih vangin an hmu leh thei lo a ni.

Prime Minister in hmarchhak political party hruaitute hmuh tumna a hnawl avang hian mi ṭhenkhat chuan sorkar laipui chuan Citizenship Amendment Bill chu an pawm lui dawn tho niin an ngai.