Hmarchhak ram neitute nihphung tihchhiat kan phal lo ang: Rahul Gandhi

All India Cong­ress Committee (AICC) President Rahul Gandhi chuan Thawhṭanni khan Citizenship Amendment Bill, 2016 chungchanga a dinna tichiangin Congress chuan Rajya Sabha-ah CAB duh lo lamah vote an thlak dawn tih a sawi.

Rahul Gandhi chuan eng pawh thleng dawn se Bill chu an dodal tlat dawn tih sawiin, hmarchhak ram neitute nihphung tihchhiat chu an phal dawn lo tih a sawi bawk.

AICC President hian Thawh­ṭanni khan hmarchhak mipui aiawh pawl pathumte chu CAB chungchangah hian a hmu a ni. Rahul Gandhi chuan Northeast Students Organisation (NESO), Krishak Mukti Sangram Samity (KMSS) leh scholar Hiren Gohain kaihhruai civil society pawlte a hmu a ni.

NESO advisor Samujjal Bhattacharya chuan Rahul Gandhi an hmuh thu leh an dinhmunte an hrilhfiah thu a sawi. CAB chuan Assam Accord a palzut dante pawh an hrilh thu a sawi bawk a, Bill chu hmarchhak mite  ṭawng, tihdan phung leh nihphung tan thil hlauhawm tak a nih thu a sawi.

Bhattacharya chuan Rahul Gandhi hnenah chuan Bill chu Rajya Sabha-a pawm a nih leh chuan Assam Accord chu a tichhe dawn hle tih sawiin tihtawp a ṭul tih an hrilh thu a sawi a, NRC update kalpui mek pawh a tibuai vek dawn tih a sawi bawk.

Rahul chuan hmarchhak ram neitute ṭawng, tihdan phung leh nihphungte chu tu tichhiat mah an phal dawn lo tiin a lo chhang a ni. 

Akhil Gogoi kaihhruaina hnuaiah KMSS member-te pawhin AICC president hi an hmu bawk a, Rahul chuan KMSS member-te hnenah hian an party leh UPA-a an thawhpuite chuan Bill hi an dodal dawn tih a lo hrilh bawk.

Scholar Gohain pawhin Congress chief hi a hmuh zawh hnuah inkawmna ṭha tak an neih thu leh Gandhi chuan an party in CAB an dodal dawn tih a lo tiam thu a sawi.

Rahul Gandhi hian West Bengal Chief Minister Mamata Banerjee pawh bia in CAB chungchangah chuan a thlawp tur thu a hrilh tawh bawk  a ni.