Assam-ah Encephalitis vanga thi 12 an awm tawh
Assam-ah Pathianni thleng khan Japanese Encephalitis (JE) leh Acute Encephalitis Syndrome (AES) vanga thi mi 12 an awm tawh a, JE vei mek mi 35 an awm bawk.
Pathianni khan JE vang hian Guwahati Medical College and Hospital (GMCH)-ah tleirawl pakhat a thi a, Mangaldoi-a putar pakhat kum 72 pawh ni kua enkawl a nih hnuah Guwahati-a GNRC damdawi-inah a thi ve bawk a ni.
Jorhat district-ah chuan kar hnih chhungin JE vang hian mi paruk an thi tawh a, Jorhat Medical College & Hospital-ah pawh AES vei mi 48 leh JE vei mi 17 ziahluh an ni tawh tih official-te chuan an sawi.
Dibrugarh, Baihata Chariali leh Doboka-ah pawh case ziahluh a awm tawh bawk. Hetihlai hian union health minister Harsh Vardhan chuan Pathianni khan Assam dinhmun enfiah tur team hian Assam an pan tawh tih a sawi. Ministry of Health and Family Welfare-a Additional Secretary Sanjeeva Kumar chuan Health Ministry team-te hi a kaihruai a ni.