Hnathawh ṭhat peih loh chuan bang mai rawh u: Tripura CM

Tripura chief minister Biplab Kumar Deb chuan Pathianni khan an state-a sorkar hnathawk ṭha lo vauin, hna thawk ṭha lo hriatchhuahte chu 'voluntary retirement' a chhuah tir an ni dawn tih a sawi. 

Tripura Government Em­ployees Sangha in Rabindra Shatabsashiki Bhawan-a an rally buatsaiha thu a sawiah CM chuan, "Ka hna hi ka ngaihluin ka la thutak hle. Hetiang bawkin midangte pawh ṭha taka thawk vek turin ka duh a ni. Sorkar hna in duh a nih chuan ṭha takin in thawk tur a ni. Ṭhalai tam tak hna nei lo an awm a, hei vang hian hna in thawk ṭha peih lo a nih chuan bang mai rawh u," a ti. 

CM chuan, "Chief secretary aṭanga Group-D hnathawk thlengin, hna thawk ṭha lo chu voluntary-in chawlh tir nghal an ni ang," tiin a sawi. Department office hrang hrang hnathawh danah harsatna a awm ṭhin thu sawiin, Chief Minister chuan," Sorkar hnathawkte chuan an hna an la chelh duh a nih chuan an thawk ṭha tur a ni," a ti. 

Tripura-ah hian BJP-IPFT sorkar a din hnuah employment policy thar hman a ni. State sorkar chuan sorkar hnathawk kal ṭha lo leh an hnaa inthlahdah mi eng emaw zat chungah action pawh a la tawh bawk. State-in power lamah harsatna an tawh chungchang pawh sawichhuakin, Deb chuan sorkar hmasa, Left sorkarin transformer hluite an thlak loh vang tih a sawi. Electric Department-a thawk, hna an thawhna hmuna thi lineman, electrician, helper leh midangte chu an chhungte hnenah zángnadawmna cheng nuai 10 pek an ni dawn tih a sawi. Sorkar chuan duty-na hmuna hliam tuarte enkawlna atana Rs 35,000 a pek ṭhin pawh Rs nuai 5-ah a tihsan thu a sawi bawk a ni.