AP: PM in project eng emaw zat hawng dawn
Prime Minister Narendra Modi chuan Inrinni-a Arunachal Pradesh a tlawh hunah project eng emaw zat a hawn dawn bakah scheme eng emaw zat lungphum a phum dawn bawk niin nimin khan official-te chuan an sawi.
Official-te chuan Hollongi-a green field Airport siamna tur lungphum pawh PM hian a phum nghal dawn niin an sawi a ni.
Prime Minister Modi hian Lohit district-a Tezu-ah retrofitted airport pawh a hawng dawn bawk niin an sawi a, Doordarshan-a Arun Prabha channel bakah 110 MW hydro electric project te, health and wellness centrea 50 te pawh a hawng dawn bawk.
Jote-ah Film and Television Institute lungphum a phum dawn bawk a, Comprehensive Scheme hnuaia siam tur electric sub stations pasarih lungphum pawh a phum dawn niin an sawi.
Sella Tunnel leh a pawhtu kawngpui, Tawang district-a siam turte lungphum a phum dawn niin an sawi a, Saubhagya Scheme hnuaia cent per cent household electrification puanna a nei dawn tih an sawi bawk.
Lungphum phumna leh project hrang hrang hawnna hi state khawpui Itanagar-a Indira Gandhi Park-ah neih a ni dawn tih sawiin, venhimna pawh uluk taka kalpui a nih dawn thu an sawi.
Chief Minister Pema Khandu leh Deputy Chief Minister Chowna Mein-te chuan Nilaini khan IG park-a inbuatsaihna kalpui dan hi a hmunah kalin an enfiah tawh a ni.