PM-in Assam-a Rs vbc 15,000 connectivity project a hawng

Prime minister Narendra Modi chuan Ningani khan virtual mode hmangin Assam-a connectivity project hrang hrang, cheng vaibelchhe 15,000 hu a hawng. 

Narendra Modi chuan heng project-te hian trade, economy leh industry lam a tihchangtlun dawn bakah, hmarchhak bial tan tourism industry lamah kawng thar a hawn sak dawn tih a sawi. Heng project hmang hian West Bengal, Assam, Manipur, Meghalaya, Mizoram, Tripura-te tan Bangladesh leh Bhutan nena inkalpawhna ṭha leh awlsam zawk a awm thei dawn a ni, a ti. 

Project hawn zinga Rs vbc 3,231 senna tur,  Mahabahu-Brahmaputra project-ah hian Neamati-Majuli Island, North Guwahati-South Guwahati leh Dhubri-Hatsingimari inkara Ro-Pax vessel operation, Jogighopa (Bongaigaon district)-a Inland Water Transport (IWT) terminal siamna tur leh Brahmaputra luia tourist jetties pali - Neamati, Biswanath Ghat, Pandu leh Jogighopa-a siamna turte a tel. 

Prime Minister hian Brahmaputra lui-a km 19-a thui Dhubri-Phulbari river bridge dawhna tur lungphum pawh a phum nghal a, hei hi ram chhunga river bridge thui ber tur a ni. Rs vbc 5,000 senga siam tur,  Dhubri-Phulbari river bridge  Dhubri (North Bank) leh Phulbari (South Bank) inkalpawhna tur a ni.