CAB duh lohna lantir nasa

Citizenship Amendment Bill, 2016 duh lohna lantir nasat lai takin Prime Minister Narendra Modi chuan hmarchhak a tlawh a, mipui-te chuan flag dum nen lo hmuakin CAB duh lohna thute an lo auchhuahpui a ni.

PM Modi hian Zirtawpni khan Guwahati airport thlengin, Assam finance minister Himanta Biswa Sarma leh official pawimawh te chuan an lo hmuak. Guwahati aṭanga Raj Bhavan a panna kawngah hian All Assam Students' Union (ASSU)-te chuan flag dum nen lo hmuakin, CAB duh lohna an lantir, Samujjal Bhattacharya, ASSU advisor chuan BJP chu anti-Assamese a nih thu leh CAB chu ram leilung fate tana harsatna thlentu a nih thu a sawi.

Asom Gana Parishad (AGP)-te pawhin torchlight protest neiin, PM tlanna kawng aṭangin hla vak loah CAB duh lohna an lantir ve bawk a, heng pawl pahnihte hian PM-in a tlawh denchhen hian Rajya Sabha-a CAB pawm tum duh lohna an lantirna a ni.

Inrinni pawh kha Asom Jatiyadabadi Yuva Chhatra Parishad (AJYCP)-te pawhin Machkhowa area-ah flag dum hi an lo hmuh bawk a, Jalukbari area-a Gauhati University an tlanpelh lai pawhin zirlai thenkhat chuan flag dum an lo hmuh bawk.

Adabari leh Fancy Bazar area-ahte pawh Krishak Mukti Sangram Samiti (KMSS) leh AJYCP-te chuan flag dum an lo hmuh ve leh bawk a ni. Krishak Mukti Sangram Samiti (KMSS) activist pakhat phei chuan CAB duh lohna lantir nan ruakin PM Modi hi a lo hmuak a ni.