NESO in RS-ah CAB pawm lo turin PM vau

North East Students’ Orga­nisation (NESO) chuan Ningani khan Prime Minister Narendra Modi hnenah message thawnin Rajya Sabha-a Citizenship Bill pawm lo turin an vau a, pawm a nih chuan hmarchhakah buaina nasa tak a chhuak dawn tih an sawi.

Ningani-a thuchhuah an siamah NESO chuan,"Prime Minister leh India sorkar hnenah thu chiang tak kan thawn duh a ni, hmarchhak ram leilung fate chuan he draconian bill hi kan pawm dawn lo a ni," an ti.

Prime Minister Narendra Modi hian tunkar chhung hian Assam, Tripura leh Arunachal Pradesh-te a tlawh dawn a ni.

NESO chuan pawl hrang hrang leh political party hrang hrangten nasa taka an dodal chunga Lok Sabha-a January 8-a bill pawm luih a ni chu politics dik lohzia entirna a nih thu an sawi. India sorkar chuan hmarchhak ram leilung fate chu an ngaipawimawh lo hle tih lantirna a nih thu sawiin, ram neitute chu an ram ngeiah hnam tlem zawka siamna tur a nih tih hrereng chungin hma an la tih an sawi bawk. 

NESO chuan PM leh India sorkar chu vau zuiin Upper House-ah bill pawm a nih chuan hmar­chhakah chuan buaina nasa tak a chhuak dawn tih sawiin, buaina a chhuaha hmarchhak mipuite enhran an nih chuan India sorkar chu mawhphurtu a nih dawn thu an sawi bawk a ni.