Manipur: Raj Bhavan bulah Bomb a puak, 4 an hliam

Manipur Raj Bhavan bulah Ningani khan bomb hlauhawm tak a puak a, Assam Rifles trooper pathum leh futui zuar pakhat in hliam an tuar.

Hliam tuarte hi Lamphel-a Regional Institute of Medical Sciences-ah hruai nghal an ni a, an dinhmun tak erawh tarlan a ni lo. 

Bomb hi Ningani zan tir dar 6.15 vela puak kha niin, Army M-Sector admi­nistrative office hmaa puak a ni a, eng pawl mahin an tih a nih thu an la sawi lo a ni.

State leh central force-te chuan beihpui thlakin bomb puahna hmun leh a chhehvel chu an dap nghal a, mahse tumah  an la man lo.

Manipur-ah hian Citizenship Bill dodalna a nasa hle a, hemi a nih avang hian venhimna pawh kalpui uluk hle a ni a, khawpui chhung hmun hrang hrangah security force-te dah niin venhimna uluk taka kalpui a nih thu tarlan ni mah se hmun hrang hrangah tharum thawhna a thleng reng tho a ni.