PM Flag dum vaikhum vangin mi pakua man

Prime Minister Narendra Modi chuan Zirtawpni leh Inrinni liamta khan hmarchhak state pathum- Assam, Arunachal Pradesh leh Tripura-te a tlawh a, Assam-ah hian Citizenship Amendment Bill, 2016 duh lotu pawl ṭhenkhat chuan flag dum hmuhin, an lo vaikhum a ni.

Heng flag dum vaikhumtu zinga mi Asom Jatiyatabadi Yuba Chatra Parishad (AJYCP) member palite chu Assam police-te chuan an man a, man zingah hian Guwahati city student's body committee president Pradip Kalita pawh a tel.

Anni bakah Gauhati Uni­versity zirlai pangate pawh flag dum lo vaikhum vang hian man an ni bawk. Gauhati Univer­sity zirlaite hian Inrinni zinga Prime Minister in Raj Bhavan aṭanga Guwahati Airport a panna kawngah flag dum hi an lo vaikhum a ni.

PM in hmar­chhak a tlawh lai hian CAB duh loh­na nasa taka lantir niin, All Assam Students’ Union (Aasu) leh KMSS activist-te chuan Inrinni khan PM Modi lim hi an hal. Asom Gana Parishad (AGP) thlawptute pawhin bill duh lohna hi lantirin central Guwahati-a Guwahati club rotary-ah flag dum an vai a ni. Changsari-a Modi-an thu a sawi lai pawhin AASU member-te chuan Amingaon-ah balloon dum an chhuah bawk.

Police-te chuan ASSU-te hi Modi lim hal an tum laiin an hnawtdarh niin an sawi a ni.

Press meet-ah AASU adviser, Samujjal Bhatta­charyya chuan Modi chu Assam Accord kalpuina tur chungchanga mawhphurtu tute meeting ko loah a puh a, tunah chuan citizenship bill chu hlauhawm loh tiin mipuite rilru hneh leh a tum tawh a ni, a ti. Dan loa ramchhunga lutte chu sakhuana behchhanin a ṭhenhran theih loh a ni, a ti bawk.