Tripura lal thlah Pradyot Manikya-an CAB sut turin PM ngen

Prime Minister Narendra Modi-an Inrinni-a Tripura a tlawh hnu lawk khan, Tripura lal thlah Pradyot Manikya chuan Pathianni khan Prime Minister chu Citizenship Amendment Bill sut turin a ngen.

Pradyot Manikya chuan bill chu hmarchhak mipuite duhdan a nih loh thu leh an tana thil hlauhawm thei a nih thu a sawi.

Arunachal Pradesh, Assam leh Tripura a tlawh ṭumin PM chuan CAB chungchangah a kalpui dan tur mumal tak pakhatmah a sawi lo a, Tripura minister pakhatmahin PM hnenah hemi chungchang hi an thlen lo bawk.

Manikya chuan report ṭhenkhatin a tarlan dan aṭangin February 12 hian Rajya Sabha-ah bill hi pawm a ni maithei tih sawiin, JDU, Shiv Sena leh party dangte pawh bill dodal zawnga vote thlak tura a biak thu leh, leilung fate tana harsatna a thlen a nih phawt chuan RS-ah pawh kawng a dap dawn tih a sawi.

Political party-te chu an party-te theihnghilhin an hnam nihphung leh tihdante humhim tura ding turin a chah bawk a, political party zawng zawngte chu inlungruala CAB dodal turin a sawm bawk.

Manikya chuan politics, thuneihna leh party chu thil kumhlun lo a nih thu sawiin, mipuite chu ngaipawimawh hmasa turin a ti a ni.

AICC President Rahul Gan­dhi hnenah pawh Citizenship Bill chu RS-a pawm a nih chuan Congress National Manifesto-ah paihna tur telh tura a ngen thu a sawi a, chutiang thil a thleng a nih chauh lo chuan Congress leh party dangte pawh an ringzo dawn lo tih a sawi.