CAB pawm a nih chuan NDA aṭangin NPP in-hnukdawk dawn

Meghalaya Chief Minister, Conrad K Sangma chuan Inrinni khan Rajya Sabha-a Citizenship Amendment Bill pawm a nih chuan National People’s Party (NPP) chu BJP-kaihhruai National Democratic Alliance (NDA) aṭangin an inhnukdawk dawn tih a sawi.

Conrad K Sangma chuan State Convention Centre-a NPP general body meeting an neih zawh hnua media miten an kawmnaah, an party chuan inlungrual takin thutlukna an siam tih sawiin, Rajya Sabha-a CAB pawm a nih chuan an party chu NDA aṭangin an inhnuk­dawk dawn tih a sawi a ni.

Conrad hi Inrinni khan chuh­puitu awm loin NPP President atan thlan nawn a ni a, an party chuan lungrual takin CAB dodal turin thutlukna an siam tih a sawi a, an resolution siam chu sorkar laipui hnenah pawh an thlen dawn tih a sawi bawk.

CAB chungchang hi vawiin hian Rajya Sabha-ah an ngaihtuah rin a ni. 

Hmarchhak political party hrang hrangin, NPP leh Asom Gana Parishad (AGP) kaihhruaina hnuaia hma an lakna chu NDA-a an thawhpui ten an thlawp ṭha em tih zawhna chu Conrad chuan thlawpna an dawn ṭhat thu a sawi.

Delhi-ah political party hrang hrang an hmuh thu sawiin NDA-a an thawhpuite bakah eptu lam party Shiv Sena, JD (U) Akali Dal, BJD leh TMC-te pawh an hmu tih a sawi bawk.

CM chuan mipui duhdan an tihhlawhtlin theih loh chuan an sorkar chuan awmzia a nei dawn lo tih sawiin, bill thlawptu lam chu eng sorkar pawh nise an thawhpui thei dawn lo tih a sawi a ni.