Assam Congress-in fuel man sang duh lohna lantir

Assam Pradesh Congress Committee (APCC) chuan nimin aṭang khan an state chhung hmun hrang hrangah fuel man sang zel duh lohna lantirin nawrh an huaihawt. 

Nawrh an huaihawt tur chung­changa thuchhuah an siam­ah, APCC media department chairperson Bobbeet Sharma chuan fuel leh nitin mamawh man sang zel avanga mipuiten harsatna an tawh mekah, mipuite aw-ah an ṭang dawn tih sawiin nitin lungawi lohna hi lantir an tum dawn tih an sawi. District leh block committee tin hnenah pawh nawrh huaihawt a, mipuite hnenah sorkarin chhiah a lak nasat avanga phurrit a thlen dante hrilhfiah tura an tih thu a sawi bawk. 

Bora chuan BJP sorkarin chhiah leh thil man tihsan hmanga mipui nawlpuite a rawk mek laiin, Congress party chu mipuite aiawhtu, an aw-ah an ṭang dawn a ni, a ti. "Congress party chuan mipuite harsatna leh mangannate chu a hriatthiampui a, sorkar laiin thil man a tihsan zel avanga an harsatna neihte pawh a hriatpui a ni. Nitin mamawh man sang hi mipui nawlpuiten an tuar nasain, an nitin khawsak thlengin a nghawng tawh a, thil man a san zel avangin nute pawhin an fate mamawh ang pawh an pe thei tawh lo a ni," a ti. Hei vang hian thil man sang duh lohna an lantirna chu thlawp turin mipuite a ngen bawk. 

"BJP chuan a ṭhianṭha, sum­dawng liante leh private com­pany-te duhsakna nasa taka a lantir laiin, mipui nawlpuite erawh hremin an awm thung a ni," tiin Bora chuan a sawi. Fuel man a tihsan zel avangin BJP sorkar chuan kum ruk chhungin Rs vbc nuai 20 zet a hlawh tih sawiin, petrol base price chu litre khat Rs 33.46 leh diesel chu Rs 31.82 a ni a, mahse Assam-ah chuan petrol litre khat Rs 87 leh diesel litre khat Rs 82 in leitir an ni tih a sawi a ni.