AP CM-in zirlaibuah an state history telh duh

Arunachal Pradesh chief minister Pema Khandu chuan an state-a zirlaiten an state chanchin chiang zawka an hriat theihna turin zirlaibuah state history leh culture-te telh a duh thu a sawi. 

Itangar-a Group Captain (Rtd) Mohonto Panging Pao-a lehkhabu ziah, 'Flights of Fantasy: Heroes of 1962 Indo-China War, Abu Tani's Speaking Tree and other articles' a tlangzarhnaah CM chuan he thu hi a sawi a ni. 

Khandu chuan state mipui 80%-90% chuan an state history leh culture-te chu an hrechiang tawk lo niin a sawi a, hei vang hian ṭhangthar zawkte hnenah lehkha an zir tirh aṭanga chiang taka an state chanchin zirtir hi a ṭul a ni, a ti. State education department hnenah pawh primary level aṭanga state chanchin zirna chapter telh tura rawtna a thlen tawh thu a sawi bawk. 

CM chuan hetianga hma an lak chhoh chuan hmun danga mite pawhin hmarchhak bial chanchin leh culture ngaihnawm tak takte chu an hrechiang thei dawi dawn a ni, a ti. Group Captain (Rtd) Mohonto Panging Pao lehkhabu tlangzarh hi Arunachal Pradesh leh hmarchhak bial chanchin ziahna, article 91 awmkhawmna a ni a, a hmain 'Keerook and Other Stories from Northeast India' tih a lo ziak tawh bawk.