Covid vaccine lak hnuah Manipur health worker a thi A chhungte zángnadawmna pe turin sorkar an phut

Manipur-a anganwadi worker, kum 44 mi Wahengbam Sundari Devi chu Covid-19 vaccine a lak aṭanga kar khat hnu, kar liam ta Zirtawpni khan a thi. Anganwadi Workers and Helpers Union of Manipur chuan a chhungte hnenah zángnadawmna, Rs nuai 50 pe turin sorkar an phut. 

Wahengbam Sundari Devi hian vaccine dose khatna hi February 12 khan a la a, vaccine a lak hnu hian khawsik leh allergy a nei a, mahse hei hi a nih dan tur pangngai angah a ngaih avangin hospital-ah in check up kher loin damdawi dawrah damdawi a lei a ni. Mahse a nat a zual zel avangin FHC, Moirang-ah admit a ni a, Imphal hospital-ah refer zui a ni bawk. Mahse thawk lamah harsatna a neih chhoh avangin Imphal pawh hi an panpui thei lo. Ventilator hman tir niin Zirtawpni zing khan a thi ta a ni.  

Devi chhungte chuan vaccine a lak hma hian doctor duty hnenah kum khat liamtaa Asthma natna a lo neih tawh thu leh, allergy a neih thute pawh a hrilh niin an sawi. Mahse doctor hian hei hi a lo ngaih pawimawh sak lo niin an sawi a, hei vang hian a thihnaa mawhphurtute chunga action lak phutin Kumbi Lai Sandhong-ah mipui an pungkhawm bawk. 

Anganwadi Workers and Helpers Union chuan chief minister N Biren Singh hnenah memoradum thehlutin, Devi chhungte hnenah zangnadawmna Rs nuai 50 pek tura an phut thu a sawi. Workers' union hruaitute nena an inkawm hnuah, CM pawhin Devi chhungte a tawrhpui thu sawiin, thil ti diklote chungah action lak ngei a nih tur thu a sawi.