International Folklore Film Festival-ah Manipur film Rongmei chhuah dawn

Kerala-a International Folklore Film Festival-ah Manipur-a Rongmei tribe film chu chhuah tur zingah thlan tel a ni. 

Minute 120-a rei, ‘Nakamh-Riangsuanneic’ hi Rongmei hnam, Kachangthai Gonmei siam a ni a, a script pawh a ziah vek a ni bawk. 

‘Nakamh-Riangsuanneic’ hi Rongmei Naga folklore behchhana siam niin, kum 2020 February thla khan Central Board of Film Certification aṭangin censor certificate a dawng a ni. Kerala Folklore Academy, Chirakkal-in festival a buatsaiha competition section-a tel tur film pakua thlan zingah a tel a ni. He film-ah hian Manipur khawthlang lam, Makuailuangdih khuaa fahrah  Nikamh chanchin tarlan a ni. 

Film siamtu, Kachangthai hian Rongmei film dang panga - San Khou Rui De, Baanhthi Baanhnam, Baanhthi Baanhnam 2, Nagta Na de Zeanmei leh Puinau Puidaa-te a lo siam tawh bawk.