Rajnath Singh-an Hmarchhak CM-te meeting neihpui tur ṭhulh

Union Home Minis­ter Rajnath Singh chuan Thawhṭanni khan chawpchilh takin Citizen­ship (Amendment) Bill chungchanga hmarchhak chief minister-te meeting a neihpui tur chu a ṭhulh.

Rajnath Singh hian Thawhṭanni tlai dar 4.30 khan a North Block office-ah chief minister-te hi meeting neihpui tur a ni a, mahse chawpchilh takin a ṭulh leh a ni. Meeting ṭhulh chhanah hian mi ṭhenkhat chuan hmarchhak state ten nasa taka bill an dodal chuan awmzia a nei ṭan niin an ngai.

CAB hi nimin khan Rajya Sabha-ah ngaihtuah tura ruahman a ni a, pawm a nih loh nan hian hmarchhakah chuan dodalna a nasa hle a, Samajwadi Party Rajya Sabha member Javed Ali Khan pawhin NESO hnenah bill dodal zawngin vote an thlak dawn tih a hrilh bawk.

Hetihlai hian kar liamta khan Prime Minister Naren­dra Modi chuan hmarchhak a tlawhnaah CAB chuan hmarchhak mipuite tan harsatna a thlen dawn lo tih a sawi thung.

CAB duh lo hian Thawhṭanni khan Nagaland-ah chuan total bandh huaihawt a ni a, Manipuir-ah pawh civil society organisation-te chuan bill duh lohna hi an lantir bawk.