CAB dodalnaa thlawptu zawng turin Meghalaya CM Delhi-ah zin

Meghalaya Chief Minister Conrad Sangma chu Pathianni khan Citizenship Amendment Bill duh lo lama vote tura political party ṭhenkhatte ngen turin New Delhi-ah a zin. 

Conrad Sangma chuan Nimina Rajya Sabha-a pharh, CAB dodalna kawnga thlawp tura intiam political party hruaitute hmu turin New Delhi-ah chuan a zin tih sawiin, National People’s Party (NPP) national general body meeting Inrinni-a an neihah CAB RS-a pawm a nih chuan an party chuan  Bharatiya Janata Party kaihhruai National Democratic Alliance aṭanga inhnukdawk tura thutlukna siam an rel tlu tih a sawi.

Sangma chuan sorkar laipui hnenah pawh hmarchhak chuan bill chu an duh lo tih a hriattir tawh thu sawiin, an party chuan mipuite duh loh danin thutlukna an siam thei lo tih a sawi. CAB chu dan a chantir a nih chuan hmarchhak democraphy chu a danglam vek dawn tih sawiin, ram neitute chu hnam tlem zawkah an chang mai dawn tih a sawi.

Sangma kaihruai NPP leh hmarchhaka regional political party eng emaw zat bakah, Asom Gana Parishah (AGP)-te chuan Guwahati-ah CAB dodal tur hian lungrual takin thutlukna an siam tawh a ni.