Manipur: CAB duh loh vangin Hmeichhia-te haw duh lo

Manipur state khawpui Imphal-a hmeichhe bazar pali-a hmeichhe thilzuarte chu Citizenship Amendment Bill an duh lohna lantir nan Inrinni aṭang khan an chenna inah an haw duh lo. 

Bazar-a riakte chuan Lok Sabha-a pawm tawh CAB chu an duh lo hle tih sawiin, zanin thleng hian riah an la tum thu an sawi a ni. Bazara ṭhu nuho haw duh lo hian police leh paramilitary force-te chu a timangang tawh hle nia tarlan a ni bawk.

Tui chungchangah te, inthiarna leh bathroom chungchangahte harsatna an tawk nasa hle nia tarlan niin, nu pakhat chuan tui supply an dawn loh avangin tui chu a bottle in an lei mai tih a sawi.

Hmeichhia ina haw duh lote chuan a tir taka routine siama sit-in protest neih an tum tih an sawi a, mahse sorkar laipui chuan bill chu pawm an tum tho nia an hriat avangin Nilaini thleng haw loa bazara awm tur chuan thutlukna an siam ta niin an sawi bawk. 

Hmeichhe ṭhenkhatah chuan zanah chuan an lum zo lo hle tih sawiin, health official-te chuan mi ṭhenkhat chu an dam loh a hlauhawm hle niin an sawi. Nawrh huaihawtte chuan sorkarin bill chuan hmarchhak, a bik takin Manipur chu a nghawng dawn lo tih ziak ngeiin thu dah se an phut thu an sawi.

Manipur-ah hian CAB dodalna hi a nasa hle a, Chief Minister N. Biren Singh pawhin Manipur mipuite humhimna tur clause telh a nih loh chuan bill chu an dodal tih a sawi tawh bawk a, an sorkar chuan bill chu an dodal zel dawn tih a sawi a ni.

Eptu party Congress pawhin hemi chungchangah hian Assembly special session neih an ngiat bawk a, state chhung hmun ṭhenkhatah chuan Prime Minister Narendra Modi leh Rajnath Singh-te lim chu hal a ni tawh bawk.

Thawhṭanni pawh khan civil society organisation 131-te chuan zing dar 5 aṭanga tlai dar 5 thleng bandh an huaihawt bawk a ni.