Assam Additional CS hluiin Congress zawm

Assam additional chief secretary hlui M.G.V.K. Bhanu chuan Thawhṭanni khan Cong­ress a zawm.

M.G.V.K. Bhanu hi nikum July thla khan a retired a ni.

Bhanu chuan miin Assam hmasawnna tur an sawi dawn a nih chuan, Congress party chu party awmchhun a nih thu a sawi a, Congress tluk zo an awm lo a ni, a ti. Tezpur-ah in te takte a neih ve thu sawiin, Tezpur khawpui chu a hmangaih tih a sawi a, hun ṭha pek a nih chuan mipuite tana thawh a duh thu leh Tezpur bialah din a tum thu a sawi. Mahse thutlukna chu party kutah a awm tih a sawi bawk.

M.G.V.K. Bhanu hi 1985 batch IAS officer Andhra Pradesh cadre niin, Assam chief minister hlui Tarun Gogoi-a right hand man tia hriat a ni ṭhin a, 2001- 2006 chhung khan department pawimawh tak tak a enkawl ṭhin a ni. Andhra Pradesh Chief Minister hlui Y.S.R. Reddy nen pawh an thawkdun tawh ṭhin bawk a ni.

Congress hian Tezpur con­stituency-ah Bhanu hi an dintir rin a ni a, helai bialah hian a lar hle nia sawi a ni bawk.

Kum 2011 leh 2013 inkar khan Tea Board of India chairman a nih ṭhin bawk avangin thingpui tharchhuah lamah scheme thar ṭha tak tak tichhuak tua hriat lar a ni a, Tezpur-ah hian thingpui huan hmanga eizawng an tam hle nghe nghe.

Hmarchhaka-a BJP kaih-hruai North East Democratic Alliance (NEDA) hnehna tur­in Congress hian North East Congress Coordination Commi­ttee (NECCC) an tharthawh leh mek bawk a ni.