Hnehna chan vanga lawm NESO ‘Moral Victory’a nih thu sawi

15th February, 2019

Hmarchhaka state hrang hranga zirlai pawl - Khasi Students’ Union (KSU), All Assam Students’ Union (AASU), Naga Students’ Federation (NSF), Mizo Zirlai Pawl (MZP), Twipra Students’ Federation (TSF), All Manipur Students’ Union (AMSU), Garo Students’ Union (GSU) leh All Arunachal Pradesh Students’ Union (AAPSU) intelkhawm, North East Students’ Organisation (NESO) chuan thuchhuah siamin hmarchhak ram leilung fate chu an lawmpui thu sawiin, sorkar laipuiin Citizenship Amendment Bill Rajya Sabha-a an pharh hman lo chu lawmawm an tih thu an sawi.

NESO chuan bill hlauhawm tak mai dona kawnga pawl hrang hrang inpekna leh hmalaknate chu lawmawm an tih thu sawiin, hmarchhak state sorkar-te hmalakna chu a chhuanawm hle tih an sawi. Meghalaya chief minister Conrad Sangma leh Mizoram chief minister Zoramthanaga-te hming pawh tarlangin an hmalakna chu fakawm an tih thu an sawi a, Students’ Union, Social Organisation leh Women Organisation hrang hrangte hmalakna chu a chhuanawm hle tih an sawi a ni.

Bihar chief minister Nitish Kumar chungah pawh an lawm hle tih sawiin, an party JD(U) chuan National Executive Council an neihnaah CAB dodalna resolution an siam chu lawmawm an tih thu an sawi bawk. Party hrang hrang Shiv Sena, Congress (I), SP, BJD, TMC, DMK, SAD, NPP, AGP,TDP leh BPF-te bakah political party dang bill an dodal tur thu auchhuahpuitute hnenah lawmthu an sawi bawk.

Tripura, Assam leh Manipur-a CAB dodal avanga hliam tuar an awm thute pawh sawichhuakin NESO chuan an huaisenna leh an hmalakna chu an zah thu an sawi.

NESO chuan CAB tlawlh chu hmarchhak ram neitute tan chuan ‘Moral Victory’ a nih thu sawiin, lungrual taka hmarchhak mipuite hmalakna avang a nih thu an sawi. Hmarchhak mipuite chuan an duh hmu tur chuan a theihtawpa an beih a ngai tih a tilangchiang hle nia sawiin, India sorkar chuan mipuite duh chu thlengin a chhawpsak dawn lo tih a tilang tih an sawi bawk.

NESO chuan India sorkar chu hmarchhak mipuite duhdan kalh zawng policy kalpui lo turin an ti bawk a ni.