KSU in hnehna kawngzawh nei

Meghalaya-a Khasi Students’ Union (KSU)-te chuan Nilaini khan Rajya Sabha-a Citizenship Amend­ment Bill a tlawlh hnu lawkah khan Shillong khawpuiah hnehna chan avanga kawngzawh an nei nghal. 

CAB a tawp tak avanga lawmin, KSU member-te chuan an flag-te pawtparhin, hnehna au hla nen kawng an zawh a ni.

KSU General Secretary, Donald Thabah chuan NESO hruaitute chu Delhi-a bill dodal tura an campaign avanga chu lawmthu hrilhin, an pawl chuan ram neitute harsatna thlen thei bill reng reng chu an dodal zel dawn tih a sawi.

Donald Thabah chuan Bill hnawl a nih chuan an pawl chuan surprise rally buatsaih an tum sa tih sawiin, Rajya Sabha-a bill pawm a nih loh chhan chu BJP sorkar chuan majority an nei dawn lo tih an hriat sa vang tih a sawi bawk. Hmarchhak mipuite chu bill ṭha lo tak do turin an inpeih reng tih a sawi bawk.

Hmarchhak NGO-te tan chuan ni lawmawm tak a nih thu sawiin inlungrual tlan chuan bill dik lo tak pawh  a do hneh theih tih entirna a nih thu a sawi a ni. 

Bangladesh mi Megha­laya-a hnathawhna permit pek chungchanga zawhna an siam chu chhangin Thabah chuan an pawl chuan an state leilung fate tana hlauhawm thei bill chu an dodal zel dawn tih a sawi.