Biren Singh leh Rijiju-te thukhawhchang

Bill pawm lo tura political hruaitu dangte ngena Delhi-a riahchilh zinga mi Manipur CM Biren Singh chuan CAB a tawp ta chu lawmawm a tih thu sawiin, mipuite tana hnehna a nih thu a sawi. Biren Singh hi political party dang pakua hruaitute nen sorkar laipuia hruaitute chu CAB dodal zawnga vote thlak tura ngen turin Delhi-ah an cham a ni.

Biren chuan tunah chuan sorkar leh mipuite chuan hmasawnna hnathawh lamah rilru an pe thei tawh dawn a ni, a ti.

Manipur CM chuan bill chu tlawlh tir phal a nih chhan chu Prime Minister, Home Minister leh Amit Shah-te chuan mipuite duhdan dik tak an hriat vang a nih thu a sawi bawk.

Biren Singh chuan dan leh thupek kenkawhna atana curfew puan a ngaih avangin mipuite hnenah ngaihdam a dil bawk a, sorkar chuan RS-a bill a tlawlh velah curfew sut tur leh internet an ban pawh sut tura thuneitute an hriattir thu a sawi.

Meghalaya chief minister, Conrad K Sangma, Asom Gana Parishad (AGP) leader Atul Bora leh Prafulla Kumar Mahanta-te chuan Nilaini khan CAB a tawp ta chu an lawm tih an sawi bawk.

Arunachal Pradesh mi, Union Minister of State for Home Kiren Rijiju chuan Bill-ah khan hmarchhak ram neitute tihdan phung, ṭawng leh kalphungte humhimna tur a awm thu sawiin, thu hriat dik loh avangin nasa taka dodal a nih thu a sawi thung.

Kiren Rijiju chuan bill chungchangha hian hmarchhak chief minister ṭhenkhat chuan Union Home Minister Rajnath Singh an hmuh thu pawh sawiin, CM-te hnenah pawh hian CAB provision ṭhenkhat chu hrilhfiah an nih thu a sawi bawk a ni. All India Majlis-e-Ittehadul Muslimeen (AIMIM) MP Asaduddin Owaisi leh All India Anna Dravida Munnetra Kazhagam (AIADMK) MP V. Elumalai-te zawhna chhangin Rijiju chuan heng thu hi a sawichhuak a ni.