Hmarchhak mite nawrna avangin CAB A tlawlh?

Citizenship Amendment Bill, 2016 chu Nilaini khan Rajya Sabha-ah a tlawlh ta a, hmarchhak mipuite tan chuan a thawventhlak hawk ngei ang.

Hmarchhak state hrang hrangte chu thla hnih chhung vel chu nawrh huaihawt leh buaina in a chiahpiah a ni ber a, January 8-a Lok Sabha in CAB a pawm aṭang phei kha chuan dodalna leh nawrh­na hi a nasa lehzual a ni. 

Tripura-ah phei chuan TSR silai hmehpuahah mi parukin hliam an tawrh phah a, hmarchhak hmun hrang hrangah dodalna a nasa hle. 

Prime Minister Narendra Modi-an kar hmasa lama hmarchhak state pathum a tlawh ṭum khan pawl hrang hrang chuan CAB duh lohna lantirin flag dumte an lo vai khum bawk a, PM leh President Ram Nath Kovind hnenah pawh vawi eng emaw zawt Bill duh lohna memo­randum thehluh a ni hman bawk.

Zirlai pawl leh civil organisa­tion-te mai piah lamah Regional political party-te pawhin nasa taka dodal in, NDA-a BJP thawhpui party-te chuan January 29 khan Guwahati-ah meeting neiin CAB duh lohna resolution an siam hial bawk a ni.

Heng bakah hian BJP thawhpui AGP chuan CAB vang hian BJP an thawhpuina an titawp bawk a, Assam Accord kalpuina tura High Level Committee dinte pawhin CAB pawm a nih chuan Assam Accord chuan awmzia a nei dawn lo tih sawiin Commitee-a ruatna hi an hnawl.

Meghalaya BJP MLA pahnihte pawhin  CAB pawm a nih chuan party an chhuhasan dawn tih an sawi ve bawk a, hmarchhaka BJP CM pahnih, Arunachal CM leh Manipur CM-te pawhin bill dodalna thu an auchhuahpui fo avangin he bill hi hmarchhak mipuite chuan an duh lo takzet tih sorkar laipui chuan a hrechiang hle.

Hei mai bakah hian Meghalaya CM Conrad Sangma chuan nasa taka hma lain a kaihhruaina hnuaiah political party hrang hrangte chu Delhi-ah zinin RS-a bill pawm a nih lohna turin party hrang hrang hruaitute hnenah ngenna an thlen bawk a, sorkar laipui pawh hian bill hi a tlang dawnin an ring lo a ni tih a rin theih a ni.