Nagaland : Thla ruk dang atan 'disturbed area'-ah puang

Armed Forces (Special Powers) Act  (AFSPA) hnuaiah Na­galand state pum chu thla ruk dang atan rambuai, disturbed area-ah puan chhunzawm leh a ni. He thupek hian December thla tawp thleng a huam ang. 

Ministry of Home Affairs (MHA) chuan hemi chungchanga hriat­tirna a tihchhuahah, sorkar laipui chuan Nagaland state pum chu hmun ralmuang lo leh ram buaiah a la ngai a, hei vang hian venhim hna thawktu sipaite hnena thuneihna sang zawk pekna, AFSPA hman chhunzawm zel chu a la ṭulin a ngai a ni, a ti. 

AFSPA hnuaiah hian sipaite chuan phalna la hmasa kher loin an mi rinhlelhte chu an manin an hreng thei a, hriattirna pe lawk kher loin beihpui an thlak thei bawk a ni. Mahse he dan hi tualchhung mite leh pawl hrang hrangte chuan na takin an sawisel fo a, he dan hmang hian sipaite chu civil mite lakah an inluling nasa hle tih an sawi a, dan sakei tia sawiin sut turin sorkar laipui pawh an nawr fo a ni. 

Mahse MHA chuan Naga­land state chhung hmun hrang hranga  inrawkna, inthahna leh inrikrapna thleng reng avang chuan 'disturbed area' a puan chhunzawm zel hi a la ngai tih a sawi. AFSPA hi Nagaland-ah hian kum eng emaw zat hman a lo ni tawh a ni.