Shillong college zirtirtuten Prof. ban duh loh vangin nawrh huaihawt

Shillong-a St Edmund’s College-a zirtirtu, Prof.Jeffreyson Wahlang ban a nih duh loh lantir nan college hrang hranga zirtirtute chuan Thawhlehni khan nawrh an huaihawt.

St. Edmund’s College zirtirtute nawrh huaihawt hi  St Anthony’s College, Shillong College, Women’s College, Seng Khasi College leh college dang eng emaw zata zirtirtuten an zawm ve a, chhan mumal awm loa ban Jeffreyson Wahlang chu a hna zawm tir leh an phut a ni.

St. Edmund’s College-a Meghalaya College Teacher’s Association (MCTA) unit chuan tiam chin awm loa nawrh huaihawt an tum. Jeffreyson Wahlang hi July 1 aṭang khan ban a nih thu tarlan a ni bawk. Thawhṭanni pawh khan St. Edmund’s College campus chhungah nawrh hi huaihawt a ni tawh.

Edmund's College unit MCTA president, Malcolm Tarian chuan kum 2012 aṭang khan College inrelbawlna hi a fel hlel tawh tih a sawi a,  May thlaa black flag day protest neihnaah Jeff hi a tel ve tih sawiin; hemi vanga ban ta nia a lan thu a sawi.

College zirtirtute nawrh huaihawt hi National Students Union of India (NSUI) pawhin an thlawp a ni. St. Edmund's College inrelbawlnaah hian thil fel tawk lo nia an hriat avangin vawi eng emaw zat zirtirtute pawhin duh lohna an lo lantir tawh ṭhin a ni.