Shillong-ah curfew pawtsei

Meghalaya-a Citizenship Amendment Act (CAA) duh lohna lantirtu, Khasi Students' Union (KSU) leh tualchhung mi, non-tribal te inkara buaina chhuak chuan ziaawm lam pan mah se, nimin khan Shillong khawpui chhung hmun hrang hrangah curfew pawhsei chhun­zawm a ni. 

Buaina chhuak vang hian Pathianni khan East Khasi Hills district magistrate M.War Nongbri chuan zan dar 9 aṭanga nimin zing dar 6 thleng atan curfew a puang. Nimin zing khan boruak ṭha lo a thlen leh venthawn thilah curfew hi pawhsei a nih thu Nongbri chuan a sawi. 

Curfew puanna hi municipal area pum, containment area  pum leh Mawlai Block huam chin, bakah Mawpat Block area huam chin te a ni. Hei bakah hian Mylliem Block,  Upper Shillong, Madanrting, Mawblei, Laitkor, Nongkseh, Umlyngka, Lawsohtun, Mawdiangdiang, Diengiong leh Siejiong-te a huam tel bawk. 

Curfew hi puan chhunzawm ni mah se, board exam tur zirlaite erawh ngaihhnathiam an ni. Meghalaya education minister Lakmen Rymbui chuan nimin aṭanga ṭan, Meghalaya Board of Secondary Education (MBOSE) final examination chu tihbuai a ni dawn lo tih sawiin, zing dar 6 aṭangin zirlaite tan curfew hi thlahdul a ni. 

Board exam hmachhawn tur, zirlaite tan an admit card chu 'curew pass' a ni nghal tih a sawi a, heng zirlaite hi mi pahnihin an zui phalsak an ni bawk.