Meghalaya CM leh Deputy CM-ten Supreme Court thutlukna an fak
Meghalaya chief minister Conrad K Sangma leh deputy chief minister Prestone Tynsong-te chuan Supreme Court thutlukna siam - state chhunga mi mal leh community rama lungalhthei laihchhuah phalna an pek chu an fak hle.
Conrad K Sangma chuan Nilaini khan official-a thuchhuah erawh an la dawng lo tih a sawi a, mahse National Green Tribunal-in lungalhthei laihchhuah a khapna chu Supreme Court chuan a hnawlsak tih erawh an hriat tawh thu a sawi.
Germany-a cham mek Sangma chuan SC thutluknaa pawimawh lai ber zawk chu tribal-te dikna chanvo hriatsak an nihna chu a ni tih a sawi bawk. Mipuiten hnehna an channa a nih thu sawi bawkin, a bik takin tribal community-te tan a nih thu a sawi a ni.
CM chuan Meghalaya chuan lungalhthei laihchhuah khapin a nghawng nasat zia, an state economy thlengin nasat taka a tuar zia chu an hriat a ngai tih sawiin; tunah chuan dan mumal tak leh kalphung mumal zawk, tunlai thiamna hmanga dan hnuaia an thawh a ngai tawh dawn a ni, a ti.
CM chuan mipuite chu economy leh ecology kalkawp thiam tir turin a chah bawk a ni. Supreme Court hian Nilaini khan lungalhthei lak chungchangah hian hearing a nei a, NGT-in Meghalaya sorkar cheng vaibelchhe 100 chawi tura a lo tih tawh chu chawi turin an hriattir. Hearing neihnaah hian state sorkar chuan hmarchhak hmun hrang hrangah dan loa lungalhthei lakchhuah reng a la nih thu an sawi.
Justice Ashok Bhushan leh K M Joseph-te kaihhruai bench chuan, state thuneitute chu dan loa lakchhuah lungalhtheite chu Coal India Limited (CIL) kuta hlan chhawng turin an ti bawk a, hei hi lilam leh tur a ni dawn tih an sawi a ni.
State te Meghalaya ang tan chuan cheng vaibelchhe 100 chawi chu thil harsa tak a nih avangin dan loa lungalhthei lachhuak tute pawisa an chawitir pungkhawm- MEPRF Fund aṭ-angin an pe dawn nia tarlan a ni.
Dy. CM Prestone Tynsong pawhin SC thutlukna chu thil chhinchhiah tlak tak a nih thu sawi ve bawkin, MDA sorkarin kum khat chhung theihtawpa an beih hnua an hlawhtlinna a tiin a sawi ve bawk.