Assam-ah thingpui chingtuten 'No Sickles' campaign nei

Assam thingpui qua­lity ṭha vawn nun zel a nih theih nan North Eastern Tea Assocation (NETA) chuan thingpui chingtute zingah 'No Sickles' campaign a nei ṭan. 

Assam thingpui hnah hi kut ngeia sih a nih avangin a quality pawh a ṭha a, khawvel huap pawhin thingpui tui tia hriat a hlawh phah a ni. Mahse thingpui chingtu ṭhenkhat chuan kut khera sik loin, favah (sickle) hman an ching ṭan a, hei hian thingpui quality a nghawng thei a ni. 

NETA chairman Nepul Saikia chuan favah, kasi tia hriat lar chu thingpui hnah sengna atana hmang lo tura ngenin, an campaign buatsaih hmang hian thingpui chingtute inhrilhhriat tir an tum tih a sawi. Saikia chuan kum 35 chhungin Assam state-a thingpui chinna ram chu nasa takin a pung chho tih a sawi. Kum 1990-a Assam-in thingpui a tharchhuah chu kg. mak­taduai 388 a nih laiin, kum 2018-ah chuan kg. maktaduai 692-ah a pung chho tawh tih a sawi a ni. 

"Kum 28 chhungin a punna hi kg maktaduai 300 vel zet a tling a, hei hi 80% vel a ni pha a ni. Mahse thingpui seng hun runpui - July, August, September leh October thlaahte thawktu lam indaih lohna a nasa hle ṭhin. Thawktu indaih loh vang hian thingpui chingtu ṭhenkhatte chuan a sengna atan hian favah hi hman an chin phah leh ta a ni," tiin Saikia chuan a sawi. 

Thingpui chingtu tam zawk chuan kut ngeiin an la sik tho a, mahse favah hman uar zel tur venna atan hian a tlai hmain campaign hi ṭan a ni tih a sawi.