Tripura-ah bawng rûk tuma puh sawisa hlum

Tripura-a Dhalai district-ah bawng rûk tuma puh, kum 36 mi Budhi Kumar Tripura chu mipui thinrimin an sawisa hlum. 

Police-te chuan he thil thlenna hi state khawpui, Agartala aṭanga km. 147 vela hla, Raishyabari-a Noarampara hmunah a nih thu an sawi. Raishyabari police station officer-in-charge Suleman Reang chuan Thawhlehni zan dar 11.30 velah mipui thinrim hian an khawih tih sawiin, damdawi-inah hruai a nih hnuah Nilaini zing khan a hliam tuar loin a thi tih a sawi. 

Tualchhung mite chuan Budhi hi mi bawng-in pakhata a lut lai hmuh a ni a, a tlanchhe tur chu in neitute chuan khawchhung mite au harhin, mipui pungkhawm chuan an man a, an sawisa zui ta a ni. Police-te chuan he thil thlenna hmun hi zan dar 12 velah an thleng a, Budhi chu mipui lak aṭanga chhanchhuakin damdawi-inah an hruai nghal a ni.