Assam Congress in-charge aṭangin Harish Rawat a bâng

Uttarakhand chief minister hlui leh Assam Congress in-charge ni bawk Harish Rawat chuan Ningani khan Congress general secretary in-charge of Assam a nihna aṭanga a ban thu a sawi.

Harish Rawat chuan Lok Sabha inthlana hmarchhaka Congress chet chhiat chhanah mawh a phur tih a sawi a, Rahul Gandhi-a'n Congress president a nihna a bansan hnuah Rawat hian Assam in-charge a nihna aṭanga a ban thu hi a sawi ve leh a ni.

Rawat chuan, "Kei ni Congress office bearer-te hian kan party chak loh chhanah leh pawl hlawhchhamnaah mawh kan phur a ni. State in-charge ka  nihna angin Assam-a kan party chetchhiat chhanah mawh ka phur bawk. Ka thiam lohna ka pawmin Assam general secretary in-charge ka nihna aṭangin ka bang," tiin a twitter-ah a sawi.

Rawat chuan, ani ang tan chuan hruaitu dinhmun chelh chu a pawimawh lo a, mahse, Rahul Gandhi chuan congress hi hruai chhunzawm zel se a duh thu a sawi tel bawk. Rahul Gandhi-a'n an party  kaihruai chhunzawm zel se chuan 2022 assembly inthlanah leh 2024  Lok Sabha inthlanah chuan a chakpui ngei tawh dawn tih a sawi. Chumi avang chuan democratic force zawng zawng leh Congress worker-te chuan Rahul Gandhi chu Congress president atan an duh a ni, a ti.

Lok Sabha inthlan neih zawh takah khan Seat 14 awmna Assam-ah hian Congress hian seat pathum chiah  an la a ni.