BJP sorkarin tea garden worker-te hlawh tipung

Assembly inthlan nei tura inbuatsaih mek, Assam-ah chuan BJP kaihhruai sorkar chuan state chhunga thingpui huana thawkte hlawh, ni khatah Rs 167 ni ṭhin chu Rs 217-ah a tihpung. 

Kar liam ta Inrinnia Chief minister Sarbananda Sonowal kaihhruai cabinet meeting chuan tea garden worker-te hlawh tihsan hi a a rel a ni. Hei bakah hian small tea worker-te hlawh pawh rualkhai taka siam a nih theihna tura rawtin, hemi kawnga hma la tur hian Principal Secretary JB Ekka hnuaiah committee din a ni dawn bawk. 

Assembly inthlan neih tura party hrang hrangte auhlaah tea worker-te hlawh tihsan hi a tel hlawm a, Congress party chuan BJP kaihhruaiin kum eng emaw zat an hlawh tihsanna tur hi a tihkhawtlai sak tawh nia sawiin na takin a lo sawisel tawh a ni. 

Congress party chuan kum 2014 Lok Sabha inthlanpui neih hma khan prime minister Narendra Modi chuan tea worker-te nitin hlawh hi Rs 350-a tihsan a lo tiam tawh niin an sawi. Assam chhim lam biala tea garden worker-te hian ni khatah Rs 145 an hlawh a, hmun dang amite chuan Rs 167 an hlawh thung. 

February 6 khan union finance minister Nirmala Sitharaman chuan 'Chah Bagicha Dhan Puraskar Mela' scheme hnuaiah, tea garder worker 7,46,667 hnenah Rs 3,000 ṭheuh a lo sem tawh a ni. He scheme hi Assam sorkar hian kum 2017-18 aṭang khan kalpui ṭanin, hemi kum hian mi 6,33,411-te hnenah Rs 3,000 ṭheuh pek an ni a, a kum lehah mi 7,15,979 hnenah pek a ni leh bawk. 

Assam-ah hian organised sector hnuaiah tea garden worker hi nuai 10 chuang an awm a, tea estate 850-ah an thawk a ni. India ram puma kum khata thingpui tharchhuah zinga 55% dawn hi Assam-a thar a ni a, thingpui huan leh a kaihhnawiha thawkte hi state chhunga vote nei zat aṭanga 30%-35% an awm. Hei vang hian party hrang hrang pawhin inthlan lo awm tur atana an auhla zingah tea garden worker-te chungchang hi an telh nasa hle a ni.