Tripura : IPFT-in TIPRA thawhpui dawn

Tripura-a state level-a BJP nena thawk dun, Indigenous People’s Front of Tripura (IPFT) chuan district council inthlan lo awm turah BJP thawhpui loin, regional party The Indigenous People's Regional Alliance (TIPRA) a thawhpui zawk dawn. 

Kar liam ta Zirtawpni khan Tripura-a tribal party pahnih, Tipraland State Party leh IPFT (Tipraha) chu inchhunfinin, Tipraha Indigenous Progressive Regional Alliance (TIPRA) an din a ni. TIPRA hian Pradyot Manikya Deb Barman kaihhruaina hnuaiah Tripura Tribal Areas Autonomous Development Council (TTAADC) inthlan lo awm tur chuh an tum thu an puang nghal bawk. 

TIPRA hian an thil phut ber chu Tipraland state hran din a ni dawn tih sawiin, district council inthlanah thlan tlin an nih chuan 'Greater Tripraland' din phutna resolution an pass tur thu an sawi. IPFT leh TIPRA hruai­tute hian inbiak­na an neih hnuah TTAADC inthlan awm tura thawkdun turin memorandun of understanding (MoU) an ziak a ni. IPFT general secretary leh tribal welfare minister Mevar Kumar Jamatia chuan Assam-a BJP kaihhruai ṭangrual sorkar hnathawh danah an party chu an lawm lo tih a sawi a, mahse BJP hi an la thawhpui chhunzawm dawn leh dawn loh erawh a sawilang lo. 

TTAADC inthlan hi nikum May thlaa neih tur kha a ni a, mahse Covid-19 hri leng avangin state election commission chuan inthlan neih hun tur a ṭhulh a ni. Hemi hnu hian thla ruk chhung atan Governor's rule puan zui a ni a, nikum November 17 khan thla ruk dang pawhsei leh a ni. 

TTAADC hian Assam state hmun 68% a huam a, Tripura state mipui hmun thuma ṭhena hmun khat an cheng. District council-ah hian seat 30 awmin, heng zinga 28 chu elected member an ni a, pahnih chu Tripur governor-in a nominate an ni thung.